રન ફોર વોટ રેલીમાં ૨૫૦૦ નાગરિકો સહભાગી થયા
લોકશાહીના મહાપર્વ એવી લોકસભા સમાન્ય ચૂંટણીના ઢોલ ઢબુકવા માંડયા છે. આ લોકશાહીના મહોત્સવને વધાવવા માટે મતદારો થનગની રહ્યા છે, ત્યારે મતદારોના ઉત્સાહ- ઉમંગને વધુ બળ આપવાના ઉમદા આશયથી આજે ગાંધીનગરના આંગણે રાજયના મુખ્ય નિર્વાચનની કચેરી અને ગાંધીનગર જિલ્લા ચૂંટણી તંત્રના સંયુક્ત ઉપક્રમે રન ફોર વોટ રેલીનું આયોજન કરવામાં આવ્યું હતું. રન ફોર વોટ રેલીમાં ૨૫૦૦ જેટલા નાગરિકો સહભાગી થઇ મતદાન માટે પ્રેરણારૂપ બન્યા હતા.
આ પ્રસંગે રાજયના મુખ્ય નિર્વાચન અધિકારી શ્રીમતી પી.ભારતીએ લીલી ઝંડી દર્શાવી રેલીને પ્રસ્થાન કરાવતા જણાવ્યું હતું કે, લોકશાહી દેશમાં મતદારો આધાર સ્તંભ છે. લોકશાહીના આ અવસરે મહિલા મતદારોમાં મતદાન અંગેની જાગૃત્તિ અર્થે અનેક કાર્યક્રમનું આયોજન કરવામાં આવ્યું છે. તેમણે મહિલા સહિત સર્વે મતદારોને લોકસભા સામાન્ય ચૂંટણીમાં વધુમાં વધુ મતદાન કરીને લોકશાહીના અવસરમાં સહભાગી થવાની પણ અપીલ કરી હતી.
રાજયના પાટનગર ગાંધીનગર ખાતે સ્વર્ણિમ પાર્ક ખાતે રન ફોર વોટ રેલીનું આયોજન સવારના ૬.૩૦ કલાકે કરવામાં આવ્યું હતું. મતદાર જાગૃત્તિના આ અવસરમાં નગરજનો અને કર્મયોગીઓ મોટી સંખ્યામાં સવારથી આવવા લાગ્યા હતા. આ રેલીમાં રાજયના મુખ્ય નિર્વાચન અધિકારી શ્રીમતી પી. ભારતી, અધિક મુખ્ય નિર્વાચન અધિકારી ર્ડા. કુલદીપ આર્ય, જિલ્લા ચૂંટણી અધિકારી અને કલેક્ટર મેહુલ દવે, જિલ્લા વિકાસ અધિકારી સંજય મોદી, ગાંધીનગર મહાનગરપાલિકાના કમિશનર જે.એન. વાધેલા, સહિત તમામ નોડલ અધિકારી અને કર્મયોગીઓ અને વિશાળ સંખ્યામાં નગરજનો ઉપસ્થિત રહ્યા હતા.
રન ફોર વોટ રેલીને રાજયના મુખ્ય નિર્વાચન અધિકારી પી. ભારતી અને અધિકારીઓએ લીલીઝંડી આપી પ્રસ્થાન કરાવતાની સાથે જ આ રેલીનો સ્વર્ણિમ પાર્કની સરદાર પટેલની પ્રતિમાથી આરંભ થયો હતો. આ રેલી ઘ-૪ થઇ મહાત્મા મંદિર પહોંચી હતી. ત્યાં રેલીનું સમાપન થયું હતું.
આ રેલીમાં સર્વે નાગરિકો અને કર્મયોગીઓએ આગામી તા.૦૭મી મે, ૨૦૨૪ના રોજ અવશ્ય મતદાન કરવાના સંકલ્પ સાથે સૌને અપીલ કરી હતી.
