નાણાપ્રધાન નિર્મલા સીતારમણે શનિવારે પૂર્વ-બજેટ બેઠકોના ભાગરૂપે ખેડૂત પ્રતિનિધિઓ અને કૃષિ હિતધારકો સાથે બેઠક યોજી છે. આ સમય દરમિયાન ખેડૂતોએ સરકારને સસ્તી લોન લાંબા ગાળા માટે ઉપલબ્ધ કરાવવા વિનંતી કરી છે. આ સાથે જ ટેક્સ ઓછો લાગુ કરવા અને પીએમ-કિસાનની આવક બમણી કરવા કહ્યું છે.
9 કરોડ ખેડૂતોને થશે ફાયદો
જો સરકાર આગામી બજેટમાં પીએમ કિસાનની રકમ બમણી કરવાનો નિર્ણય લેશે તો તેનો સીધો ફાયદો 9 કરોડથી વધુ ખેડૂતોને થશે. કારણ કે ઓક્ટોબરમાં જ્યારે સરકારે 18મો હપ્તો જાહેર કર્યો, ત્યારે 9.4 કરોડ ખેડૂતોના ખાતામાં 20,000 કરોડ રૂપિયા ટ્રાન્સફર કરવામાં આવ્યા હતા.
સરકાર સાથે ચર્ચા
2 કલાક સુધી ચાલેલી બેઠકમાં વિવિધ દરખાસ્તો પર વિસ્તૃત ચર્ચા કરવામાં આવી છે. આ દરમિયાન, કૃષિ ક્ષેત્રના ઘણા પડકારોના ઉકેલો જેવા કે નાણાકીય રાહત, બજાર સુધારણા અને વ્યૂહાત્મક રોકાણ પર વિચારણા કરવામાં આવી હતી. ભારત ખેડૂત સમાજના અધ્યક્ષ અજય વીર જાખરે કૃષિ ઉત્પાદકતા અને ખેડૂત કલ્યાણને વધારવા માટે લક્ષિત હસ્તક્ષેપની જરૂરિયાત પર ભાર મૂક્યો હતો.
ખેડૂતોનું શું છે માગ?
ખેડૂતોની મુખ્ય માગણીઓમાં કૃષિ લોન પરના વ્યાજ દરમાં એક ટકાનો ઘટાડો અને વાર્ષિક પીએમ-કિસાન હપ્તો રૂપિયા 6,000થી વધારીને રૂપિયા 12,000 કરવાનો સમાવેશ થાય છે. હિતધારકોએ કરવેરા સુધારણાની દરખાસ્તો હેઠળ કૃષિ મશીનરી, ખાતર, બિયારણ અને દવાઓ પર GST મુક્તિની પણ માગ કરી છે.
PHD ચેમ્બર્સ ઓફ કોમર્સ એન્ડ ઈન્ડસ્ટ્રીએ જંતુનાશકો પર GST 18 ટકાથી ઘટાડીને પાંચ ટકા કરવા વિનંતી કરી. જાખરે રાષ્ટ્રીય કૃષિ ઉત્પાદકતા વધારવા માટે ચણા, સોયાબીન અને સરસવ જેવા ચોક્કસ પાકો પર ધ્યાન કેન્દ્રિત કરવા 8 વર્ષ માટે વાર્ષિક રૂપિયા 1,000 કરોડની લક્ષિત રોકાણ વ્યૂહરચનાનો પ્રસ્તાવ મૂક્યો હતો.
સરકાર MSP પર પણ વિચાર કરી શકે
ભારતીય કિસાન યુનિયન (BKU)ના પ્રવક્તા ધર્મેન્દ્ર મલિકે લઘુત્તમ ટેકાના ભાવ (MSP) મિકેનિઝમની વ્યાપક સમીક્ષાની માગ કરી હતી. તેમણે કહ્યું કે MSPની ગણતરીમાં જમીનનું ભાડું, કૃષિ વેતન અને લણણી પછીના ખર્ચનો સમાવેશ થવો જોઈએ. નાણા રાજ્ય મંત્રી પંકજ ચૌધરી અને નાણા અને કૃષિ મંત્રાલયના વરિષ્ઠ અધિકારીઓ પણ આ બેઠકમાં હાજર રહ્યા હતા.
