રોહિત શર્મા આજે 30 એપ્રિલે પોતાનો 38મો જન્મદિવસ ઉજવી રહ્યો છે. તેમણે જયપુરમાં પત્ની સાથે જન્મદિવસનો કેક કાપ્યો, જેનો વીડિયો સામે આવ્યો છે. મુંબઈ ઈન્ડિયન્સની ટીમ તેની આગામી મેચ માટે જયપુરમાં છે, જ્યાં તેનો મુકાબલો 1 મેના રોજ રાજસ્થાન રોયલ્સ સામે થશે.
પત્ની સાથે મનાવ્યો 38 મો જન્મદિવસ
આ વીડિયો જયપુરનો હોવાનું કહેવાય છે, જ્યાં મુંબઈ ઈન્ડિયન્સ ટીમ રોકાઈ રહી છે. રોહિત શર્મા પોતાના જન્મદિવસનો કેક કાપી રહ્યો છે, તેની પત્ની રિતિકા સજદેહ તેની સાથે ઉભી છે. રિતિકા રોહિતને કેક ખવડાવી રહી છે અને પછી બંને એકબીજાને ગળે લગાવે છે.
રોહિત શર્મા અને રિતિકા સજદેહના લગ્ન 13 ડિસેમ્બર 2015 ના રોજ થયા હતા. બંને લાંબા સમયથી રિલેશનશિપમાં હતા, તેઓ પહેલી વાર 2008 માં મળ્યા હતા. 30 ડિસેમ્બર, 2018 ના રોજ, રિતિકાએ એક સુંદર પુત્રીને જન્મ આપ્યો, જેનું નામ સમાયરા હતું. 15 નવેમ્બર 2024 ના રોજ, રોહિત બીજી વખત પિતા બન્યો, રિતિકાએ એક પુત્રને જન્મ આપ્યો જેનું નામ તેમણે આહાન રાખ્યું.
IPL 2025 મેચો દરમિયાન મુંબઈ ઈન્ડિયન્સને સપોર્ટ કરવા માટે રિતિકા ઘણી મેચોમાં તેના બાળકો સાથે સ્ટેડિયમમાં જોવા મળી છે. હાલમાં, તે જયપુરમાં છે, જ્યાં હાર્દિક પંડ્યાની આગેવાની હેઠળની ટીમ 1 મેના રોજ રાજસ્થાન રોયલ્સ સાથે મેચ રમવાની છે.
રોહિત શર્મા IPLના ઈતિહાસમાં સૌથી સફળ કેપ્ટન છે. લોકોએ તેમને હિટમેન તરીકે હુલામણું નામ આપ્યું છે. રોહિત ત્રણ વન-ડે બેવડી સદી ફટકારનાર એકમાત્ર બેટ્સમેન છે. રોહિતનો જન્મ મહારાષ્ટ્રના નાગપુરમાં થયો હતો. તેમના પિતાના આર્થિક સંઘર્ષને કારણે, તેમને બોરીવલી મોકલવામાં આવ્યા, જ્યાં તેઓ તેમના દાદા-દાદી અને કાકાઓ સાથે રહેતા હતા. રોહિતના બાળપણના કોચ દિનેશ લાડે તેની સફરમાં મહત્વપૂર્ણ ભૂમિકા ભજવી હતી.
