અમેરિકાના કેલિફોર્નિયામાં આગ કહેર વર્તાવી રહી છે. લોસ એન્જલસના જંગલોમાં લાગેલી આગ હજી પણ ઓલવાઇ નથી. આ મામલે કેલિફોર્નિયાના ગવર્નરે કહ્યું કે આ ઇતિહાસની સૌથી મોટી આગ છે. આ આગમાં અમેરિકાને અબજો ડોલરનું નુકસાન થયું છે. આગ એટલી ઝડપી વધી રહી છે કે છેક રહેણાંક વિસ્તારો પણ આગની ચપેટમાં આવી ગયા છે. પરિણામે 1 લાખથી વધુ લોકોને પોતાના ઘર છોડવા મજબૂર બન્યા છે. જ્યારે હજારોની સંખ્યામાં ઘર બળીને ખાખ થઇ ગયા છે.
16 લોકોના મોત
મળતી માહિતી મુજબ જ્યારે ઘણા ફિલ્મ સ્ટાર્સ અને રાજકારણીઓના ઘર પણ બળીને રાખ થઈ ગયા હોવાની માહિતી છે. આગને કારણે 16 લોકોના મોત પણ થયા હોવાનું સામે આવ્યું છે અને ઘણા લોકો ગુમ થયાની આશંકા છે. આગ એટલી વિકરાળ છે કે આગની ઝપેટમાં 56 હજાર એકરથી વધુ જમીન આવી ગઇ છે. અધિકારીઓને ડર છે કે જો આ આગ જલ્દીથી ઓલવવામાં નહીં આવે તો મોટી દુર્ઘટના સર્જાઈ શકે છે.
ઉલ્લેખનીય છે કે ગત મંગળવારથી આ આગને કાબુમાં લેવાના પ્રયાસો ચાલી રહ્યા છે. પરંતુ ભારે પવનને કારણે આગ કાબુમાં લઈ શકાઇ નથી. અમેરિકા યુદ્ધના ધોરણે આ આગને ઓલવવાનો પ્રયાસ કરી રહ્યું છે, કારણ કે આ આગથી ઘણા શહેરો સંપૂર્ણપણે નાશ પામ્યા છે.
આગ ઓલવવા પ્રયાસો તેજ
કેલિફોર્નિયાના ગવર્નર ગેવિન ન્યુસમે જણાવ્યું હતું કે આ આગ રાજ્યના ઇતિહાસમાં સૌથી ઘાતક હતી. આ આગ ઓલવવા માટે મેક્સિકો પણ એક થયું છે. આગને કાબુમાં લેવા માટે લગભગ 14000 અગ્નિશામકોની સાથે 1600 અગ્નિશામક સાધનો અને 71 હેલિકોપ્ટરનો ઉપયોગ કરવામાં આવ્યો છે.
હાલ શું છે સ્થિતિ ?
આ આગ સતત વધી રહી છે. પેલિસેડ્સ જંગલની આગ લોસ એન્જલસમાં સાન ફર્નાન્ડો ખીણ સુધી પહોંચી ગઈ છે. સતત વધી રહેલી આગને ધ્યાનમાં રાખીને એન્સિનો અને બ્રેન્ટવુડમાં લોકોને સલામત સ્થળોએ ખસેડવાની જાહેરાત કરવામાં આવી છે. રિપોર્ટ મુજબ પેલિસેડ્સની આગ 11 ટકા કાબુમાં આવી ગઈ છે. ઇટનની આગ 15 ટકા, કેનેથની આગ 80 ટકા અને હર્સ્ટની આગ 76 ટકા કાબુમાં આવી ગઈ છે. અન્ય સ્થળોએ આગ ઓલવવામાં ફાયર ફાઇટર પ્રયત્નશીલ છે.
અમેરિકાને કેટલું નુકસાન ?
મીડિયા રિપોર્ટ્સ અનુસાર આ આગથી અમેરિકાને લગભગ 50 અબજ ડોલરનું નુકસાન થયું છે. જે હજી પણ વધી શકે છે. આ આગમાં ઘણા શહેરો સંપૂર્ણપણે નાશ પામ્યા છે. હજારો લોકોના ઘર બળીને રાખ થઈ ગયા છે. લાખો લોકોને રસ્તાઓ પર અને રાહત શિબિરોમાં રાત વિતાવવી પડી રહી છે. આ આગ હોલિવુડને પણ પોતાની ઝપેટમાં લઈ ગઈ છે. આમાં ઘણા કલાકારોના ઘર બળીને રાખ થઈ ગયા છે. આગ સતત ફેલાતી રહેવાને કારણે નુકસાનનું જોખમ વધુ વધી રહ્યું છે.
ફેક ન્યૂઝ આપનારા સાવધાન
કેલિફોર્નિયાના ગવર્નર ગેવિન ન્યુસમે જંગલની આગને લઇને ફેલાતા ફેક ન્યૂઝને રોકવા માટે એક નવી વેબસાઇટ શરૂ કરવામાં આવી છે. CaliforniaFireFacts.com નામની વેબસાઇટ શરૂ કરી છે. જેનો ઉદ્દેશ્ય ઓનલાઈન અને રાજકીય નેતાઓ દ્વારા ફેલાતી ખોટી માહિતીનો સામનો કરવાનો છે. આ સાથે આગની સાચી અપડેટ વિશે પણ માહિતી આપવામાં આવશે.
