બાંગ્લાદેશમાં લઘુમતીઓ પર થઇ રહેલા સતત હુમલાને લઇને દેશભરમાં રોષની લાગણી જોવા મળી રહી છે. ત્યારે બાંગ્લાદેશમાં લઘુમતીઓ પર સતત થઈ રહેલા હુમલાઓને લઈને કેનેડામાં વિરોધ પ્રદર્શનો થયા હતા. કેનેડામાં હિન્દુ સમુદાયના લોકોએ ટોરોન્ટોમાં બાંગ્લાદેશ કોન્સ્યુલેટની બહાર વિરોધ પ્રદર્શન કર્યું હતું. મધ્યપ્રદેશ, આસામ, જમ્મુ અને કાશ્મીર, નવી દિલ્હી, મુંબઈ, પશ્ચિમ બંગાળ, રાજસ્થાન, ગુજરાત, ઉત્તર પ્રદેશ, કર્ણાટક સહિત દેશના ઘણા રાજ્યોમાં લોકો હુમલાના વિરોધમાં રેલીઓ પણ કાઢી રહ્યા છે.
બાંગ્લાદેશમાં શાંતિ ઇચ્છીએ છીએ
કેનેડામાં વિરોધ કરી રહેલા હિંદુ સમુદાય સાથે જોડાયેલા એક કેનેડિયને જણાવ્યું કે અમે ટોરોન્ટોમાં બાંગ્લાદેશ કોન્સ્યુલેટ સામે વિરોધ કરવા માટે અહીં એકત્ર થયેલા કેનેડિયન હિંદુઓ એકઠા થયા છે. અમે વિરોધ કરી રહ્યા છીએ કારણ કે અમે જોયું છે કે 3 ઓગસ્ટ, 2024 થી બાંગ્લાદેશમાં શું થઈ રહ્યું છે. અમે ઈચ્છીએ છીએ કે બાંગ્લાદેશ લઘુમતીઓ, હિંદુઓની હત્યા બંધ કરે. પ્રદર્શનકારીઓએ વધુમાં કહ્યું કે અમે અફઘાનિસ્તાનમાંથી ગાયબ થઈ ગયા છીએ અને પાકિસ્તાનમાંથી ગાયબ થઈ ગયા છીએ, જો અમે હવે નહીં બચીએ તો બાંગ્લાદેશમાંથી પણ ગાયબ થઈ જઈશું. અમે બાંગ્લાદેશમાં શાંતિ ઈચ્છીએ છીએ.
હિંદુઓ પર હુમલા બંધ થવા જોઇએ
બાંગ્લાદેશમાં ભૂતપૂર્વ ભારતીય રાજદૂત વીણા સિકરીએ કહ્યું હિંદુ લઘુમતીઓના જીવન પર ખૂબ જ સતત હુમલા થઇ રહ્યા છે જે ગંભીર બાબત છે. બાંગ્લાદેશમાં લઘુમતીઓના ઘરો અને વ્યવસાયો પરના હુમલા બંધ થવા જોઈએ.
શેખ હસીનાએ યુનુસ સરકારને ઘેરી
આ સિવાય બાંગ્લાદેશની પૂર્વ પીએમ શેખ હસીનાએ દેશની વચગાળાની સરકારના વડા મોહમ્મદ યુનુસ પર નિશાન સાધ્યું હતું. પોતાની પાર્ટી અવામી લીગના એક કાર્યક્રમમાં ઓનલાઈન ભાગ લેતા હસીનાએ કહ્યું કે મોહમ્મદ યુનુસે બાંગ્લાદેશને અરાજકતામાં ધકેલી દીધો છે. તેણે કહ્યું કે યુનુસના કારણે જ બાંગ્લાદેશમાં સામૂહિક હત્યાઓ થઈ રહી છે અને હિંદુઓને નિશાન બનાવવામાં આવી રહ્યા છે તે આ બધાનો માસ્ટરમાઈન્ડ છે.
