ગાબા ટેસ્ટ બાદ ટીમ ઈન્ડિયાના દિગ્ગજ સ્પિન બોલર આર અશ્વિને નિવૃત્તિની જાહેરાત કરી છે. અશ્વિને પ્રેસ કોન્ફરન્સ દરમિયાન નિવૃત્તિની જાહેરાત કરી હતી. ભારતના દિગ્ગજ સ્પિનર રવિચંદ્રન અશ્વિને આંતરરાષ્ટ્રીય ક્રિકેટમાંથી નિવૃત્તિની જાહેરાત કરી છે. તેણે તેની આંતરરાષ્ટ્રીય કારકિર્દીમાં 700 થી વધુ વિકેટ લીધી હતી. ભારત અને ઓસ્ટ્રેલિયા વચ્ચેની બ્રિસબેન ટેસ્ટ વરસાદને કારણે ડ્રો જાહેર કરવામાં આવી છે. મેચ ડ્રો જાહેર થયા બાદ અશ્વિને પ્રેસ કોન્ફરન્સમાં જણાવ્યું હતું
ગાબા ટેસ્ટ બાદ ટીમ ઈન્ડિયાના દિગ્ગજ સ્પિન બોલર આર અશ્વિને નિવૃત્તિની જાહેરાત કરી છે. અશ્વિને પ્રેસ કોન્ફરન્સ દરમિયાન નિવૃત્તિની જાહેરાત કરી હતી. આર અશ્વિન ઓસ્ટ્રેલિયા પ્રવાસ પર ટીમ ઈન્ડિયાનો ભાગ છે. અશ્વિન એડિલેડ ટેસ્ટમાં રમતા જોવા મળ્યો હતો. જોકે, અશ્વિનને ગાબા ટેસ્ટમાં રમવાની તક મળી ન હતી. જોકે, મેચ દરમિયાન જ અશ્વિનના નિવૃત્તિના સંકેતો મળ્યા હતા. ડ્રેસિંગ રૂમમાંથી વિરાટ કોહલી અને અશ્વિનની એક તસવીર વાયરલ થઈ છે. જેમાં કોહલી અશ્વિનને ગળે લગાવતો જોવા મળ્યો હતો.
પ્રેસ કોન્ફરન્સમાં કરી મોટી જાહેરાત
ગાબા ટેસ્ટ વરસાદ અને ખરાબ પ્રકાશના કારણે ડ્રો રહી હતી. આ પછી પ્રેસ કોન્ફરન્સમાં કેપ્ટન રોહિત શર્મા સાથે અનુભવી સ્પિન બોલર આર અશ્વિન પણ જોવા મળ્યો હતો. અશ્વિને પ્રેસ કોન્ફરન્સ દરમિયાન આંતરરાષ્ટ્રીય ક્રિકેટમાંથી નિવૃત્તિની જાહેરાત કરી હતી. જે બાદ ચાહકોને આંચકો લાગ્યો હતો.
પોતાની નિવૃત્તિની જાહેરાત કરતા અશ્વિને કહ્યું, “આંતરરાષ્ટ્રીય ક્રિકેટના ત્રણેય ફોર્મેટમાં ભારતીય ક્રિકેટર તરીકે આ મારો છેલ્લો દિવસ છે. મને લાગે છે કે મારામાં હજુ પણ કોઈ ક્રિકેટરના નિશાન બાકી છે, પરંતુ મારી કુશળતા ક્લબ લેવલ ક્રકેટમાં જોવા મળશે. મારો આ છેલ્લો દિવસ છે. મેં રોહિત શર્મા અને અન્ય તમામ સાથી ખેલાડીઓ સાથે આ લાંબી સફરનો આનંદ માણ્યો.
એડિલેડ ટેસ્ટ છેલ્લી આંતરરાષ્ટ્રીય મેચ હતી
આ શ્રેણીની પ્રથમ મેચ પર્થમાં રમાઈ હતી, જેમાં અશ્વિનને પ્લેઈંગ ઈલેવનમાં તક મળી ન હતી. જોકે, અશ્વિનને એડિલેડમાં રમાયેલી બીજી ટેસ્ટ મેચમાં પ્લેઈંગ ઈલેવનનો ભાગ બનાવવામાં આવ્યો હતો. એડિલેડ ટેસ્ટ અશ્વિનની કારકિર્દીની છેલ્લી આંતરરાષ્ટ્રીય મેચ સાબિત થઈ, કારણ કે અશ્વિનને ગાબામાં રમવાની તક મળી ન હતી.
14 વર્ષ, 765 વિકેટ અને 4394 રન
આર અશ્વિને 2010માં ઝિમ્બાબ્વે સામે T20 મેચ રમીને આંતરરાષ્ટ્રીય ક્રિકેટમાં પ્રવેશ કર્યો હતો. તેણે એક મહાન બોલર તરીકે વિરાસત સર્જી છે. તેની આંતરરાષ્ટ્રીય કારકિર્દીમાં તેણે 287 મેચમાં ભારતનું પ્રતિનિધિત્વ કર્યું હતું. બોલર તરીકે તેણે આંતરરાષ્ટ્રીય ક્રિકેટમાં 765 વિકેટ લીધી હતી. તે આંતરરાષ્ટ્રીય ક્રિકેટમાં અનિલ કુંબલે પછી સૌથી વધુ વિકેટ લેનાર ભારતીય બોલર હતો. કુંબલેએ પોતાની કારકિર્દીમાં ત્રણેય ફોર્મેટમાં 956 વિકેટ લીધી હતી.
અશ્વિનની આંતરરાષ્ટ્રીય કારકિર્દી
ઓફ સ્પિનર અશ્વિને ભારત માટે કુલ 287 મેચ રમી છે. જેમાંથી તેણે 106 ટેસ્ટ મેચમાં કુલ 537 વિકેટ લીધી છે. તેને 200 ઇનિંગ્સમાં બોલિંગ કરવાની તક મળી. તે 37 વખત પાંચ વિકેટ ઝડપવામાં સફળ રહ્યો છે, જ્યારે 8 વખત તે મેચમાં 10 કે તેથી વધુ વિકેટ લેવામાં સફળ રહ્યો છે. તેની શ્રેષ્ઠ બોલિંગ ઇનિંગ્સમાં 59 રનમાં 7 વિકેટ અને મેચમાં 140 રનમાં 13 વિકેટ છે. આ સાથે જ તેણે 116 વન-ડે ઈન્ટરનેશનલ મેચમાં 156 વિકેટ લીધી છે. અશ્વિનને વનડે ક્રિકેટમાં ક્યારેય પાંચ વિકેટ મળી નથી. T20 ઈન્ટરનેશનલ ક્રિકેટમાં પણ તે એક વખત પણ ફાઈફર આઉટ કરી શક્યો નથી. તેણે 65 મેચમાં 72 વિકેટ ઝડપી હતી.
અશ્વિન બેટ્સમેન તરીકે ટેસ્ટ ક્રિકેટમાં પણ સફળ રહ્યો છે. તેણે ઓલરાઉન્ડર તરીકે ઘણા રન બનાવ્યા. ટેસ્ટ ક્રિકેટની 151 ઇનિંગ્સમાં તેણે 3503 રન બનાવ્યા, જેમાંથી 6 સદી અને 14 અડધી સદી તેના બેટમાંથી આવી. તેનો સર્વશ્રેષ્ઠ સ્કોર 124 રન છે. એક દિવસીય આંતરરાષ્ટ્રીય ક્રિકેટમાં, તેને 116 માંથી 63 ઇનિંગ્સમાં બેટિંગ કરવાની તક મળી અને તે ફક્ત 707 રન જ બનાવી શક્યો. તેણે ODI ક્રિકેટમાં અડધી સદી ફટકારી હતી. અશ્વિને T20 આંતરરાષ્ટ્રીય ક્રિકેટમાં 19 વખત બેટિંગ કરી છે. તે માત્ર 184 રન જ બનાવી શક્યો હતો. તેનો સર્વશ્રેષ્ઠ સ્કોર 31 રન છે.
