જવાન વાયુદળમાં જેસલમેર ખાતે ફરજ બજાવતો અને રજા લઈ વતનમાં આવ્યો હતો
જવાન મિત્રો સાથે બાઇકમાં જઈ રહેલ ત્યારે અકસ્માત સર્જાતા મૃત્યુ પામેલ
વાયુદળના અધિકારીઓ અને જવાનો વેરાવળ આવી સાથી કર્મીને વિદાય આપેલ
વેરાવળના વતની અને ભારતીય વાયુદળમાં ફરજ બજાવતા જવાનનું ગઈકાલે અકસ્માતમાં મૃત્યુ થયુ હતુ. જેથી આજે આવેલા વાયુદળના અધિકારીઓ અને જવાનોએ મૃતક જવાનને ત્રિરંગા તથા ગાર્ડ ઓફ ઓનર સાથે અંતિમ વિદાઈ આપી હતી. મૃતક જવાન રજા લઈને વતનમાં આવેલ ત્યારે અકસ્માતમાં મૃત્યુ પામતા ગમગીની છવાઈ ગઈ હતી.
વેરાવળના વતની વિશાલકુમાર સુરેન્દ્રભાઈ ગોંડ રજા લઈને વતન આવેલ અને ગઈકાલે કામકાજ અર્થે માળીયાહાટીના ચરખડી ગામ નજીક બાઈક ઉપર જઈ રહેલ ત્યારે સ્પીડ બ્રેકર ઓળંગવા જતા અકસ્માત સર્જાયો હતો. અકસ્માત થતા રોડ પર ટ્રાફિકજામના દ્રશ્યો સર્જાયા હતા. બાદમાં ઈજાગ્રસ્ત થયેલા ત્રણેય બાઈક સવારોને હોસ્પિટલ ખસેડવામાં આવ્યા હતા. જ્યાં જેમાં વાયુદળના જવાનનું ગંભીર ઈજાના થવાના કારણે મૃત્યુ નિપજયાનું તબીબોએ જાહેર કર્યુ હતુ.
મૃતક જવાન વિશાલકુમાર છેલ્લા ચાર વર્ષથી જેસલમેર ખાતે એરફોર્સમાં ફરજ બજાવતાહતો અને રજાના દિવસોમાં પોતાના વતન આવ્યો હતો. દરમ્યાન મિત્રો સાથે અકસ્માતમાં મૃત્યુ પામતા પરીવારજનોમાં ગમગીની પ્રસરી હતી. આ અકસ્માત અંગે પોલીસે ગુનો નોંધી તપાસ હાથ ધરી છે. દરમ્યાન જવાનનો મૃતદેહ વતન વેરાવળ લઈ આવવામાં આવેલ હતો. આજે અત્રે આવેલા વાયુદળના અધિકારીઓ અને સાથી જવાનોએ મૃતક જવાન વિશાલને ત્રિરંગા તેમજ ગાર્ડ ઓફ ઓનર સાથે અંતિમ વિદાય આપી હતી. આ સમયે ઉપસ્થિત સૌ ની આંખોમાંથી અશ્રુ વહેતા થઈ ગયા હતા.
