- ચૂંટણી પંચને આવકનો આંકડો રજૂ કરવા કોર્ટનો નિર્દેશ
- રાજકીય પાર્ટીઓને ઈલેક્ટોરલ બોન્ડની આવક રજૂ કરવા નિર્દેશ
- 30 સપ્ટેમ્બર સુધી આવકનો આંકડો રજૂ કરવા નિર્દેશ
સુપ્રીમ કોર્ટે ઈલેક્ટોરલ બોન્ડ સ્કીમ કેસમાં ગુરુવારે એટલે કે 2 નવેમ્બરે પોતાનો નિર્ણય સુરક્ષિત રાખ્યો છે. જોકે, આગામી સુનાવણીની તારીખ જણાવવામાં આવી નથી. ઈલેક્ટોરલ બોન્ડ સ્કીમ કેસમાં સુનાવણીના ત્રીજા દિવસે, કોર્ટે પક્ષકારોને મળેલા ફંડના ડેટાને જાળવી ન રાખવા બદલ ચૂંટણી પંચ સામે નારાજગી વ્યક્ત કરી હતી.
સુપ્રીમ કોર્ટે ચૂંટણી પંચને જણાવ્યું હતું કે રાજકીય પક્ષોએ 30 સપ્ટેમ્બર સુધીમાં ચૂંટણી બોન્ડ દ્વારા જેટલી રકમ મળી હોય તેની જાણકારી બને તેટલા વહેલા આપવા કહ્યું છે. સુનાવણી દરમિયાન CJI ડીવાય ચંદ્રચુડે સરકારને પૂછ્યું હતું કે ચૂંટણી બોન્ડની શું જરૂર છે. સરકાર પણ જાણે છે કે તેમને કોણ દાન આપી રહ્યું છે. ઈલેક્ટોરલ બોન્ડ મળતાની સાથે જ પાર્ટીને ખબર પડે છે કે કોણે કેટલું દાન આપ્યું છે.
આ અંગે સરકાર વતી સોલિસિટર જનરલ તુષાર મહેતાએ કહ્યું હતું કે સરકાર એ જાણવા નથી માંગતી કે કોણે કેટલા પૈસા દાનમાં આપ્યા. દાતા પોતે પોતાની ઓળખ છુપાવવા માંગે છે. તે ઈચ્છતા નથી કે અન્ય કોઈ પક્ષને તેની જાણ થાય. જો હું કોંગ્રેસને દાન આપી રહ્યો છું, તો હું ઈચ્છતો નથી કે ભાજપને તેની જાણ થાય.
ચીફ જસ્ટિસ ડીવાય ચંદ્રચુડ, ન્યાયમૂર્તિ સંજીવ ખન્ના, ન્યાયાધીશ બીઆર ગવઈ, ન્યાયમૂર્તિ જેબી પારડીવાલા અને ન્યાયમૂર્તિ મનોજ મિશ્રાની ખંડપીઠ દ્વારા ચૂંટણી બોન્ડની માન્યતાના કેસની સુનાવણી ચાલી રહી છે. આ અંગે ચાર પિટિશન દાખલ કરવામાં આવી છે. અરજીકર્તાઓમાં એસોસિએશન ફોર ડેમોક્રેટિક રિફોર્મ્સ (એડીઆર), કોંગ્રેસ નેતા જયા ઠાકુર અને સીપીએમનો સમાવેશ થાય છે.
કેન્દ્ર સરકાર તરફથી એટર્ની જનરલ આર વેંકટરમણી અને સોલિસિટર જનરલ તુષાર મહેતા સુપ્રીમ કોર્ટમાં હાજર થયા છે. અરજદારો વતી વરિષ્ઠ વકીલ કપિલ સિબ્બલ હાજર રહ્યા હતા.
